गजल
– अस्मिता भट्टराई
जवरजस्ती आनन्दको सागर तर्न सक्दिन म
उमङ्गको झरना बनी दिलमा झर्न सक्दिन म
चाँदनीझै श्रृङ्गार गरी इन्द्रेणीको रंग भरी
तिमीलाई हेर्दै लज्जाएर मुस्कार छर्न सक्दिन म
स्तब्ध यी नयन अनि भावशुन्य चेहराले
हृदयको संघारभित्र स्वागत गर्न सक्दिन म
भावना र कल्पनाको संगममात्र होइन जीवन
तिम्रा रित्ता आकांक्षाका घडा भर्न सक्दिन म
बन्दिपुर–७, तनहुँ
गजल
– अशोक बोहरा ‘असीमपीडा’
जहर घोलेर घुट्को लगाउने मन लाग्छ किन
माया प्रीति बसाएर भगाउने मन लाग्छ किन
कस्तो अनौठो शक्ति छ प्रभु ! यो जञ्जाल प्रेममा
मृत त्यो लास पनि जगाउने मन लाग्छ किन
यहाँ जिन्दगी नै दुई दिनको रामछाया हो भने
बञ्जड भूमिमा पसिना बगाउने मन लाग्छ किन
निश्चल गगनमा चोखो आत्मा छ भने
स्वर्गमा गई अमृत मगाउने मन लाग्छ किन
सडक छेउछाउमा गल्लीहरुबीच फाँसी लगाई
मूर्ख ‘अशु’ आफ्नै देह टँगाउने मन लाग्छ किन
टीकापुर – ९÷११, मालिकापथ, कैलाली
गजल
– आर. के. ‘अदिप्त’ गिरी
यो भीरको उता अर्को भीर छैन होला
लुकाएर राख्नेको मन थीर छैन होला
बेथितिले जताततै खजमजिएको ठाउँ छ
असार रोप्ने गरीबको मङ्सिर छैन होला
मनकै ईश्वरसँग पनि आपत्ती र विपत्ती छन्
दुख्नु खपिनसक्नुको त्यो पीर छैन होला
माछोभित्र माछोकाल छट्पट् भइरहेछ कतै
बाँच्नलाई उँचो शिर तकदीर छैन होला
अन्धो यो समाजको बैरङ्ग कैले पोल्ने हामी
फर्काउने अन्धोेपना कुनैै नजीर छैन होला
शब्दघर, पर्वत
गजल
– आमोद
घरसमीपको पाखामा डाक्यौ
आऊ प्यारा भनी काखामा डाक्यौ
केही बेरमै हाल्दै सुसेली
आहा ! क्या मिठो भाकामा डाक्यौ
बनेर रानु कजाइ हजार
मधु–घडाका ती चाकामा डाक्यौ
उतारी फेरि नक्सा जीवनको
भन्सार नजाने नाकामा डाक्यौ
ढिकुरपोखरी, कास्की
गजल
– आर.बी. ‘फ्लेम’
सेतो कागज भन्थ्यौ तिमी, चरित्रमा दाग लाग्यो
साथीसंगी जस्ता थिए, उस्तै तिम्रो भाग लाग्यो
‘साधुहरु’ जमात आए तर ‘ऋषि’ भेटिएनन्
फुल चोर्ने कोइली थियो, हेर्दा ठ्याक्कै काग लाग्यो
दूध ख्वाएर पाले पनि सर्पले त डस्छ भोलि
चिनेनौ कि त्यही सर्प, तिमीलाई नाग लाग्यो
‘सहरबाट जाडो भाग्यो’ फर्जी कुरा पत्याएछौ
आऊ मिली आगो फुकौंं फेरि अर्काे माघ लाग्यो
पोखरा
No comments:
Post a Comment